Num 27 | ZomZIV | STEP | Manasseh’ tapa Mikir’ tapa Gilead’ tapa Hepher’ tapa Zelophehad tanute pen Joseph tapa Manasseh bawng’te ahi uh hi. A tanute minte in: Mahlah, Noah, Hoglah, Milcah le Tirzah ahi hi. Amaute in

Numbers 27

Zelophehad’ Tanute

1 Manasseh’ tapa Mikir’ tapa Gilead’ tapa Hepher’ tapa Zelophehad tanute pen Joseph tapa Manasseh bawng’te ahi uh hi. A tanute minte in: Mahlah, Noah, Hoglah, Milcah le Tirzah ahi hi. Amaute in 2 Kikhopna Puanbuk lutna kiangah va neh uh a, Moses le siampi Eleazer, makaite le mipi bup mai-ah dingin, 3 “Ka pa uh sehnel-gam ah si khin hi. Amah Korah nungzuite lakah kihel loin, TOPA langpang lakah kipawlkhawm lo uh hi, tua hi-a, ama mawhna hangin si a tapa a sihsan kei hi. 4 Tapa a nei kei ta zongin bang hanga a bawng’te pan a min mangthang zawzen ahi hiam? Ka pa uh tanaute lakah neihsa hong pia un,” a ci uh hi.

5 Tua ciangin Moses in amau thu TOPA mai-ah puak-a, 6 TOPA in ama kiangah, 7 “Zelophehad tanute gen thuman ahi hi. A pa tanaute gouluah lak panin amaute neihsa pia pelmawh inla amau pa’ gouluah amau mah pia in. ^a

8 “Israel-te kiangah, “Papi khat a sih a tapa a nusiat kei leh ama gouluah a tanu pia un. 9 Tuapa in tanu a neih kei leh ama gouluah a sanggampa pia un. 10 Amah in sanggam pasal a neih kei leh a gouluah ding a pa sanggam pasalte pia un. 11 A pa in sanggam pasal a neih kei leh ama bawng’ sunga a kinaipih penpen in a goutanh dingin pia un. Hih pen TOPA in Moses a thupiaksa Israel-te zuih dinga kisam ngeina khat hi ding hi,’ ci in,” a ci hi. ^b

Joshua in Moses Laih

12 Tua ciangin TOPA in Moses tungah, “Hih Abarim mualdung ah paito inla Israel-te ka piaksa gam en in. 13 Na muh khit ciangin nang zong na sanggampa Aaron mah bangin na mite kiangah hong kigawm ding hi; 14 ahang in, Zin Sehnel gama tuiphual ah mipite in kei hong lehdo lai-un amaute mitmuhin na nih un ka thupiak na mang kei uh a, ka siantho zahin nong pahtawi kei uh hi,” a ci hi. (Hihte Zin Sehnel gamsung Kadesh a, Meribah tuite a ahi hi.)

15 Moses in TOPA tungah, 16 “TOPA, mihingte khempeuh khate Pasian in hih mihonte a uk ding mikhat seh inla 17 amaute mai ah paikhia in lut henla TOPA mite a cing om lo tuu tawh a kibat loh nadingin amaute makaihkhia in a lutpih ding hi hen,’ a ci hi.

18 Tua ciangin TOPA in Moses kiangah, “Kha a a nei mipa Nun tapa Joshua sam inla ama tungah na khut nga in. 19 Siampi Eleazar le mipi khempeuh mai-ah dingsak inla amaute omin za pia in. 20 Israel mipi bupin ama thu a man nadingun na thuneihna pawlkhat amah pia in. 21 Amah siampi Eleazar mai-ah dingin tuapa in TOPA mai-ah Urim thudotna tawh thukhensatna a dong ding hi. Ama thupiaksa-in amah le Israel mipi bup pusuak ding uh a, ama thupiaksa mahin a sungtum ding uh hi,” a ci hi.

22 TOPA in amah a thupiaksa bangin Moses in a hih hi. Joshua paipih-a, siampi Eleazer le mipi bup mai-ah a dingsak hi. 23 Tua ciangin Moses tungah TOPA lahsa bangin ama tungah a khut nga-a za a pia hi.